الأربعاء، 16 يونيو 2010

مش عارفة ليه !




عارفة
مش عارف ليه
متونس بيكى وكأنك من دمى
على راحتى معاكى و كأنك امى
مش عارف ليه
عارفة
حاسس إنى لأول مرة بشوفك
و إنى بشوفك من أول لحظة فى عمرى
حاسس إنى يمامة بتشرب فى كفوفك
و إنك شجرة وضلة ومية بتجرى
مش عارف ليه
مش عارف ليه
متونس بيكى و كأنك من دمى
على راحتى معاكى وكأنك أمى
مش عارف ليه
عارفة
فرحة كبيرة وصوت مزيكا فى قلبى
و كأننا حبيبين اتقابلوا بعد فراق
ليه فجأة بقيت مستنى لوحدى
ليه بتكلم وأحكيلك وأشكيلك همى
مش عارف ليه
مش عارف ليه
متونس بيكى وكأنك من دمى
على راحتى معاكى وكأنك أمى
مش عارف ليه
و أنا وياكى بحس بدنيا دنيا سلام وأمان
و أن العالم ما فيهوش ولا نقطة أحزان
ايدك خليها فى ايدى أنا طفل كبير
ايدك خليها فى ايدى انا طفل كبير
و بحس ان أنا وانتى لوحدينا ورد فى بستان
مش عارف ليه متونس بيكى وكأنك من دمى
على راحتى معاكى وكأنك امى
مش عارف لييه


*
*
*
والله أنا الى مش عارفة الأغنية دى بتعمل فيه كدة ليه
كل ما بسمعها وعادة دا بيحصل بدون ترتيب مسبق يعنى جت قدامى فى التليفزيون فى المواصلات
بتلغبط جدا وببقى مش مجمعة خالص
و دموعى تنزل لوحدها
هو صوت على الحجار الرخيم والمزلزل والدافى فى نفس الوقت
و لا الكلمات العبقرية النضيفة الموحية الى بتعزف على اوتار المشاعر و الأفكار بشكل غير مسبوق
و لا هى الفكرة المبتكرة الى ما فيهاش ولا كلمة حب و لا ميت حبيبتى و روحى و مش عارف ايه و رغم كدة قالت كل حاجة
كل حاجة
ولا موسيقى عمر خيرت الاوبرالية المدوية
ولا كل دا مع بعضه
ولا ولا حاجة من دا وهى حاجة غيرهم خالص
ايه اللغبطة دى بقة
مش عارفة ليه بتدخلنى فى حالة خاصة جدا
والغريب ان دا بيحصل كل مرة و كأنى بسمعها لاول مرة
يعنى
مش هتكون أول و لا آخر حاجة مش فاهماها!

هناك 6 تعليقات:

Ms Venus يقول...

الاغنية اكيد رائعة

Unknown يقول...

جربت هذا الشعور مع بعض الأناشيد أو الأغاني.. عندما يصل إلى مسمعي في لحظة بعينها في شعور بعينه في حالة بعينها ويكون متوافقا معها تماما (كالقفل والمفتاح) أو (كالأنتيجين والأنتبادي الموافق له) أو كأي تشبيه يعجبك!!! المهم أن الأغنية بكلماتها ولحنها تلتصق التصاقا بتلك المشاعر لتوضعان معا في رف واحد من الذاكرة، وبالتالي لا تستدعى إحداهما إلا وأتت معها الأخرى... وهو ما عنيته بالضبط في موضوع (آلة الزمن)..

بارعة كالعادة في إخراج مكنوناتك بآلاف العبارات السلسة مستخدمة -فقط- ثمانية وعشرين حرفا...!

في انتظار المزيد.. وأحب افكرك فيه كام سلسلة كده إنتي سايباهم بعد ما بدأتيهم.. يا ريت تعبريهم...!

منتحرة بخنجر الحرف يقول...

Ms Venus
الروعة فى ذوقك و مرورك
نورتِ المدونة

منتحرة بخنجر الحرف يقول...

ماجد القاضى
مين فينا الى برع فى الوصف بقة؟!!!
انت بتتكلم عن ظاهرة نفسية مشهورة وهى الاستجابة الشرطية
بافلوف بقة والقصة الى أنت عارفها
ممكن يكون كدة فعلا وأنا مش فاكرة هى ارتبطت بايه
ليه لا
ادعيلى بس أقدر أركز فى المدونة اكتر وانا اكمل كل الى بديته
دايما منور

باحث عن حب يقول...

السلام عليكم
الاغنيه فظيعه
ورائعه جدا جدا
كلمات موسيق
غناء
اهلا بيك
يا دكتوره
دعواتك انا فى امتحانات

منتحرة بخنجر الحرف يقول...

أهلا اهلا يا محمود
ربنا معاك ويوفقك يا رب
شد حيلك