الجمعة، 22 أكتوبر، 2010

تخاريف صباحية

و طبعا ما حدش بيخرف بالفصحى


أحيانا بنعمل تصرفات تبدو غريبة أو نهتم اهتمام مبالغ فيه من وجهة نظر الآخرين أو العكس
أحيانا بنقول كلام واحنا نقصد معنى تانى خالص أو نعمل حاجات ما لهاش معنى ظاهريا دا احنا أحيانا نكون مقسومين اتنين رغم اننا من برة شكلنا واحد بس
كل الموضوع ان فيه واحد هو الغالب
ليه اليد العليا
أحيانا نعمل تصرفات و بعد ما نعملها نحس ان فيه واحد تانى الى كان بيتصرف مش احنا
أحيانا تكون جوانا زوبعة لا تبقى ولا تذر ثورة عارمة واحنا مبتسمين ومتالقين و متأنقين كمان
أحيانا بنقول حاجات مش عاوزينها و أحيانا بنقول كل حاجة عاوزينها من غير ما نقولها
أحيانا بنهتم بناس واحنا مش مهتمين بيهم فعليا لكن اهتمامنا الظاهرى يحسب لينا و أحيانا مش بنهتم بناس هما أهم عندنا من أى حد تانى و عدم اهتمامنا بيحسب علينا و نتحاسب عليه كمان
كدة واكتر بكتير
كلها ألاعيب نفس بشرية عتيقة
الى يفكر فى التفاصيل الصغيرة كل تفصيلة لوحدها يتعب و يزهق جدا وربما يكره الشخص الى صدرت منه التفاصيل
لكن لو ركزنا شوية و جمعنا كل التفاصيل زى لعبة البازل كدة ممكن نرتاح حتى لو ما فهمناش
حل المشكلة الازلية دى هى التماس الأعذار الى امرنا بيها الرسول الكريم
لانه أكيد أكيد فى جزء من اللوحة دايما مختفى عنا فيه حلقات مفقودة فى أى صلة انسانية مستحيلة الوصف أو الحكى او الشرح
الخلاصة
اعتبروها تهاويم فلاسفة
نهاركم زى الفل 

هناك 10 تعليقات:

غير معرف يقول...

وهكذا قرر الملك الحكيم أن يشرب هو ووزيره من مياه البئر فيصبحا مثل سائر أهل القرية .. والقصة أساسا أن ساحرة سحرت البئر الوحيدة في القرية فأصبح من يشرب منها مجنونا ولم يتبق إلا الملك ووزيره كانا يشربا من مورد منفرد والنتيجة أصبحا بعرف الآخرين مجنونان . المراهقة الفكرية أساسها مخالفة المألوف لأجل المخالفة فقط بدلا من المساهمة في تطويره نحو الأفضل

ماجد القاضي يقول...

جميلة جدا بجد...

لكن أخالفك.. ممكن التخاريف تكون بالفصحى...!

أم هريرة (lolocat) يقول...

السلام عليكم ورحمة الله

انا مع استاذ ماجد
فعلا اشد التخاريف ساعات بتكون بالفصحى
واحيانا اكتر التخاريف بتكون فى الاخر حكمة
زى حالتك تمام الصفات اللى انت بتتكلمى فيها دى اسمها مراعاة شعور الغير - الايثار احيانا- اصول وتقاليد احيان اخرى
بتفرض علينا اشياء مش بنحب نعملها لانها مخالفة للى احنا عايزينه لكن لازم نعملها لان دى تربيتنا ونشأتنا ومش سهل على انسانة تربت بأسلوب راسخ انها تحيد عن المفروض حتى لو مخالف لرغباتنا

والصراع اللى جواك اسمه النفس البشريه اللى منها المطمئنة واللوامة والخبيثة وغيرها
وواضح ان نفسك لوامة وده جميل

استمتعت مع كلماتك
تقبلى مرورى وتحياتى لك

منتحرة بخنجر الحرف يقول...

ماجد حبيبى
فيه حد بردو بيفكر بالفصحى؟!!!
عديها عشان تعدى
شكرا جزيلا ربنا ما يحرمنا من مرورك أبدا

منتحرة بخنجر الحرف يقول...

أم هريرة
والله انا الى استمتعت أكتر بمرورك و تعليقك العميق المتفهم
شكرا لكِ عميقة بعمق كلامك
نورتينى

منتحرة بخنجر الحرف يقول...

غير معرف
من سمات المراهقة بشكل عام هى التمرد والتمرد يتعرف بمخالفة المألوف
لحد هنا مع حضرتك
لكن مين يقدر يعرف اذا كانت المخالفة لمجرد المخالفة وبس ولا لانها بداية ثورة فكرية حقيقية على يد أضعف خلقه؟!!!
تلك هى المشكلة!
تعرف حضرتك ان المراهق سموه مراهق ليه؟
الفكر الخاطئ لأنه بيرهق من حوله
لكن الصح
لان من حوله بيرهقوه بعدم تفهمهم ليه
لولا آخر جملة بتاعت التطوير نحو الأفضل ما كنتش عرفت حضرتك
نلتقى لنرتقى هههههه
بجد متشكرة جدا ونورتنى

كلمات من نور يقول...

حلوة التخاريف دي و أحلى مافيها التماس الأعذار وكما قال ابن سيرين: إذا بلغك عن أخيك شيء فالتمس له عذرا، فإن لم تجد له عذرا فقل لعل له عذرا.

سلمت يداكي

منتحرة بخنجر الحرف يقول...

كلمات من نور
تسلمى من كل سوء يا رب
شكرا على اضافتك القيمة حبيبتى

منتحرة بخنجر الحرف يقول...

كلمات من نور
تسلمى من كل سوء يا رب
شكرا على اضافتك القيمة حبيبتى

منتحرة بخنجر الحرف يقول...
أزال المؤلف هذا التعليق.